ह्या पांढऱ्या वाकड्या तिकड्या
तिरक्या नागमोडी रेषा

हे थुलथुलीत लिबलिबित
शिथिल ओटीपोट

हे सिझेरीयने कापून
शिवलेले सात अस्तर

जगातल्या कुठल्याही कंपनीने
बनवू नये ह्या खुणा घालवण्याचं औषध

जगातल्या कुठल्याही कंपनीने
बनवू नये ह्या रेषा लपवणारं क्रिम

आम्ही मिरवू ह्या खूणा पोटभर
पांढऱ्या वाकड्या तिकड्या
तिरक्या नागमोडी

विनासंकोच उघड्यावर
दुग्धपान करवू बाळाला बिनदिक्कत
नकोय आम्हाला हिरकणी कक्ष

आम्ही जन्माला घालू
स्त्री पुरुष किंवा तृतिय
तुमच्या परवानगीशिवाय

अथवा
शिवून टाकू गर्भाशय तसंच
काहीच न प्रसवता

मिरवत राहू कोरं करकरीत पोट
अथवा ह्या पांढऱ्या वाकड्या तिकड्या
तिरक्या नागमोडी रेषा.

सारिका उबाळेच्या #कथार्सिसमधून

#11एप्रिलराष्ट्रीयमातासुरक्षादिवस