അമ്മേ അമ്മേ ഇതെങ്ങോട്ടാ അമ്മേ ഇപ്പോ പോകുന്നെ.. അച്ഛനുണ്ടാരുന്നല്ലോ വീട്ടിൽ .. അച്ഛനെ വിളിക്കുന്നില്ലേ അമ്മേ നമ്മള് തന്നെ എവിടെ പോകുവാ? ..അമ്മ ഒന്നും പറഞ്ഞില്ലല്ലോ ഇന്നു റ്റാറ്റാ പോകുന്ന കാര്യം..ഇരുട്ടാണല്ലോ അമ്മേനെ മുറുക്കെ കെട്ടിപിടിച്ചിരിക്കാം.. അല്ലേൽ കുഞ്ഞിന് പേടിയാകും.. ഹായ്‌ അമ്മേ നല്ല രസം.. അമ്മ എന്നെ ഇങ്ങനെ പൊക്കിയിട്ട് കൈ വിട്ടു കളിപ്പിക്കുമ്പോൾ നല്ല രസാണ്.. വായുവിലൂടെ പറക്കുന്ന പോലെ... അയ്യോ അമ്മേ ഞാൻ താഴെ വീണു.. അമ്മ എന്തിനാ എന്നെ ഒത്തിരി ഉയരത്തിൽ ഇട്ടേ.. ഞാൻ താഴെ വീണത് കണ്ടോ.. വാ അമ്മേ എന്നെ എടുക്ക് എനിക്ക് വേദനിക്കുന്നു..
അമ്മേ.. അമ്മേ ആഹ്..
ആ അമ്മ വരുന്നുണ്ടല്ലോ.. അമ്മേ അമ്മ എടുത്തപ്പോ വേദന കുറഞ്ഞല്ലോ...
അമ്മേ ... നല്ല വേദന എടുത്തു ... എന്നെ
എറിഞ്ഞിട്ട പോലെ തോന്നി.. ഏയ്‌ എന്റെ അമ്മ അങ്ങനെ ചെയ്യില്ല.. അമ്മ പാവമല്ലേ....എന്റെ അമ്മ എന്നോടിങ്ങനെ ചെയ്യില്ല, അല്ലേ അമ്മേ? നല്ല വേദന ഉണ്ട്.. നമുക്ക് വീട്ടിൽ പോകാം.. അവിടെ എന്റെ പാവക്കുട്ടിയും കരടി കുട്ടനുമൊക്കെയേ ഇല്ലേ അവരുടെ കൂടെ കളിച്ചാൽ മതിയമ്മേ.. വിശക്കുന്നുണ്ട്.. കുഞ്ഞിന് പാൽ വേണം അമ്മ മോന്റെ പാൽകുപ്പി എടുത്തില്ലാരുന്നോ.. ഇച്ചിരി പാൽ അതിൽ ബാക്കിയുണ്ടാർന്നു.. അമ്മ എന്താ എന്നെ ആശ്വസിപ്പിക്കാത്തെ... കുഞ്ഞിന്റെ തലയാ അമ്മേ മുട്ടിയെ.. കുഞ്ഞിന്റെ തലയിൽ ഒരു ഉമ്മ മരുന്നു തന്നാമതി വാവേന്റെ വേദന ഒക്കെ മാറും അമ്മേ... അമ്മേ എനിക്ക് പേടിയാവുന്നു... എന്നെ ചേർത്തു പിടിക്കമ്മേ.. തണുക്കുന്നുണ്ട്. അയ്യോ എന്താ അമ്മേ എന്നെ എന്തിനാ പിന്നേം കളിപ്പിക്കുന്നെ... ഇനീം കളിക്കണ്ടാ.. കുഞ്ഞിന്റെ തലയിലെ വാവു മാറട്ടെ.. വേണ്ട അമ്മേ കുഞ്ഞിനെ പൊക്കണ്ടാ.. എനിക്ക് പേടിയാ.. അയ്യോ അമ്മേ ഞാൻ പിന്നേം വീണല്ലോ... അമ്മക്കെന്താ പറ്റിയേ... അമ്മേ വാ.. കുഞ്ഞു പിന്നേം വീണു... അമ്മേനെ കാണാൻ പറ്റുന്നില്ലല്ലോ... അമ്മയും വീണിട്ടുണ്ടാവുമോ..കുഞ്ഞിനെ എടുക്കാൻ വായോ...ദൈവമേ എന്റെ അമ്മയ്ക്കു വാവു വരുത്തല്ലേ.. അമ്മേ.. കുഞ്ഞിന് വയ്യാ.. കണ്ണടഞ്ഞു പോവുന്നു.. ഒത്തിരി വാവു പറ്റി കുഞ്ഞിന്.. അമ്മേ അമ്മേ അമ്മേ അമ്.. അം . 😭😢😭😢-കുഞ്ഞു വിയാൻ യാത്രയായി...

നിഷ്കളങ്ക ചിരിയോടെ നമ്മുടെ മനസ്സിൽ പതിഞ്ഞ കുഞ്ഞു വിയാന്റെ മുഖം ഇന്ന് ഓരോ അച്ഛനമ്മമാരുടെയും നൊമ്പരമാണ്.. പേറ്റുനോവറിയാത്ത ഉദരങ്ങൾ പോലും ആർത്തലച്ചു കരഞ്ഞു പോകും ഈ കുരുന്നിനെ ഓർത്ത്,, അവർ ഒരു നിമിഷമെങ്കിലും ചിന്തിച്ചുകാണും കുഞ്ഞേ നീ എന്റെ ഉദരത്തിൽ ജന്മമെടുത്താൽ മതിയാരുന്നു എന്ന്.

പുലർച്ചെ ആവുന്നതിനു മുൻപേ അവൻ നല്ല ഉറക്കമായിരുന്നിരിക്കില്ലേ.. ഒരുപക്ഷെ അവൻ ഉറക്കമുണർന്നിരുനെങ്കിലോ.. അവൻ മനസ്സിൽ ഓർത്തിട്ടുണ്ടാവും അമ്മ എന്നേം കൊണ്ട് റ്റാറ്റാ പോവാണെന്നു.. ഇതൊക്കെ ആവില്ലേ അവൻ ചിന്തിട്ടുണ്ടാവുക. അവന്റെ അമ്മയോട് അല്ല അവനെ പ്രസവിച്ച ആ സ്ത്രീയോട് കൊഞ്ചി കൊഞ്ചി പറഞ്ഞിട്ടുണ്ടാവുക.
അവൻ പറഞ്ഞ ഓരോ വാചകത്തിലും അമ്മ എന്നാ വാക്ക് നിറഞ്ഞു നിന്നിരുന്നു. .. അവസാന വാക്കും അമ്മ എന്നല്ലേ.. അവൻ വിശ്വസിച്ചിരുന്ന അവന്റെ ദൈവമല്ലേ അത്.. അവന്റെ ജീവൻ സംരക്ഷിക്കാൻ കടപ്പെട്ടവൾ.. അവൾ തന്നെ അവന്റെ ഘാതക ആകുമെന്ന് അവൻ അറിഞ്ഞിരുന്നില്ലല്ലോ...

കഴിഞ്ഞ വർഷങ്ങളായി ഒരുപാട് വാർത്തകൾ നമ്മെ തേടിയെത്തുന്നുണ്ട്.. കുരുന്നു ജീവനുകൾ ഇല്ലാതാകുന്ന വാർത്തകൾ.. അവിടെല്ലാം നമുക് കാണാം ...ഘാതകരായ സ്വന്തം മാതാപിതാക്കളെ.. രണ്ടാനമ്മ - രണ്ടാനച്ഛൻ മാരെ ബന്ധത്തിൽ ഉള്ളവരെ.. അധ്യാപകരെ.. അയൽക്കാരെ.. ഒക്കെ.. ആ കുഞ്ഞുങ്ങളുടെ ഒക്കെ പേരുകൾ പറഞ്ഞില്ലെങ്കിലും എല്ലാവരും നമ്മുടെ മനസിൽ ഒരു നീറുന്ന ഓർമ ആണ്.. തൊടുപുഴയിലെ പപ്പി ആലപ്പുഴയിലെ ആദിഷാ ഈ കുഞ്ഞുങ്ങളൊന്നും ആരുടേം മനസ്സിൽ നിന്ന് മാഞ്ഞിട്ടുണ്ടാവില്ല ...

താലോലിക്കപ്പെടേണ്ട കൈകളാൽ മരണം ഏറ്റുവാങ്ങാൻ ഇനി കുഞ്ഞുങ്ങൾ ഇത് പോലുള്ള ദുഷ്ട സ്ത്രീകളുടെ ഉദരങ്ങളിൽ ജന്മമെടുക്കാതിരിക്കട്ടെ..

ഞാനും രണ്ടു വയസുള്ള ഒരു മോളുടെ അമ്മയാണ്...വിവിധ അമ്മമാരുടെ ഉദരങ്ങളിൽ ആണ് ജനിക്കുന്നതെങ്കിലും എല്ലാ കുഞ്ഞുങ്ങളിലും ആ നിഷ്കളങ്കത കുസൃതി കളി ചിരി ബാലിശമായ എല്ലാ സ്വഭാവങ്ങളും ഒരുപോലെ ആയിരിക്കും . അത് കൊണ്ട് കുഞ്ഞുങ്ങൾ ആരുടെ ആയാലും മക്കളെ സ്നേഹിക്കുന്ന അമ്മമാർക്ക് ആ കുഞ്ഞുങ്ങളിൽ എല്ലാം തന്റെ കുഞ്ഞിന്റെ മുഖം മാത്രമേ തെളിഞ്ഞു കാണു..അതിൽ ആർക്കൊരപകടം പറ്റിയാലും ആദ്യം നമ്മുടെ മനസ്സിൽ ഓടിയെത്തുന്നത് നമ്മുടെ കുഞ്ഞിന്റെ കാര്യമാകും. മക്കളെ സ്നേഹിക്കുന്ന അച്ഛനും അങ്ങനെ തന്നെ ആണ് ..

എപ്പോഴും ഒരു പ്രാർത്ഥനയെ ഉള്ളു,," എന്റെ ദൈവമേ പറക്കമുറ്റാത്ത എല്ലാ പിഞ്ചു പൈതങ്ങളെയും അറിഞ്ഞും അറിയാതെയും വരുന്ന സകല ആപത്തനർത്ഥങ്ങളിൽ നിന്നും നീ തന്നെ കാത്തു കൊള്ളേണമേ ...

-അഹ്‌സ