Guddu kab se bethi ho yahan. Mene show bhi dekh liya, bartan bhi saaf kar diye aur ek tum ho jo tas se mas nahi hoti, ye kehte hue jaan dimple ke baaju me aakar beth jaati hain.


Dimple nazre churaate hue jaan ko zor se hug kar leti hai. Aakhir aankhen milaaye bhi to kese. Jaan uski laal aankhon se pehchan jo jaati hain ki royi thi unki guddu.


"Kya hua guddu, tum mujhe dara rahi ho. Meri taraf dekho"


"Kya jaan, ab me tumhe jhappi bhi na daalun. Personal jaan ho tum meri, koi padosi ki mummy ko thodi na pakda hai mene" Itna kehkar dimple zor se hansti hai.


Fir ekdum se plate aur diary utha kar andar ki taraf daud lagati hai, " Jaan aao zara mujhe pakad ke dikhao, ha ha hi hi hi ha ha, abhi keh rahi thi me hili nahi, chalo ab pakdo mujhe."


Ye sab karna padta hai dimple ko taaki jaan uski aankhen padh na sake. Taaki uski hansi thitholi me wo khud ko sambhalne ka mauka de sake.


Jaan apni guddu ke peeche andar aati hain.
"Ab me jawan to hoon nahi guddu ki tum chakkar lagwa rahi ho. Chupchaap yahan aakar beth jaao. Warna tumhe chai nhi milegi."


"Arre jaan tum chai ko beech me naa laaya karo"
Ye kehkar dimple jaan ke paas beth jaati hai. Jaan ke gaal khinchte hue kehti hai, khabardaar jo meri jaan ko buddhi kaha.


"Oo meri jauhrazabeen, tujhe maloom nhi tu ab tak hai haseen aur me jawaaaan, tujhpe kurbaan meri jaan meri jaan"


"Guddu, tum kab badi banogi haan. Ab ye gaana band karo aur jaake so jaao. Kal mandir chalenge bhagwaan ko prasad chadhaane. College to tumhara 15 din baad shuru hoga na."


"Haan jaan. Good night jaan, koi dikkat ho ya darr lage to mujhe awaaz dena."


"Guddu darpok tum ho me nhi. Jaake so jaao ab. Kal mera bhi school se off hai, tumhe ghuma kar bhi laungi."


Dimple ne jaan ko good night waali jhappi di aur fir apne kamre me chali gayi.


Khidki se bahar chaand ko ghanton nihaarna use acha lagta hai. Taaron se baatein karna aur zyada acha lagta hai. Dimple kehti hai ki taaron me apne rehte hain....

"Taare nahi hain wo
Wahan kuch apne rehte hain
Adhuri reh gayi jo kahaniyan
Wahan sapne rehte hain
Nadi hi to hai akashganga hamari
Ek aur tum aur tumse itni door
Ham rehte hain....... "


#destinedlove
#DakshDimple

© Gauri_68