ಮೇಘ ಸಂದೇಶ ಕಳಿಸಿರುವೆನು ಗೆಳತಿ
ಮನದಿ ಅಡಗಿದ ಭಾವನೆಗೆ ಜೀವ ತುಂಬಿ
ಪ್ರೀತಿಯ ಸಮ್ಮತಿಯನು ತಿಳಿಸುವೆಯಾ
ಪ್ರೇಮದ ಮಳೆಯನು ಸುರಿಸುತಲಿ ಗೆಳತಿ

ಬಿರಿದ ಧರೆಗೆ ಮಳೆಯ ಆಗಮನವು ತಂಪು
ಬರಿದಾದ ಹೃದಯಕೆ ನಿನ್ನ ಪ್ರೀತಿಯೇ ತಂಪು
ಸುರಿದು ಬಿಡು ಒಮ್ಮೆ ದುಮ್ಮಿಕ್ಕಿ ಹನಿಯಾಗಿ
ನನ್ನೆದೆಯಲ್ಲಿ ಒಲವಾಮೃತದ ಧಾರೆಯಾಗಿ

ತುಂಬಿ ಬಿಡು ಮನಸಿನಲ್ಲಿ ಹೂಮಳೆಯಾಗಿ
ಜೊತೆಗಿರು ಸದಾ ಸಂತೋಷದ ಸಂಗಮವಾಗಿ
ಉಕ್ಕಿ ಹರಿಯಲೆಂದೂ ಸಂಭ್ರಮದ ಹೊಳೆಯಾಗಿ
ಜೊತೆಯಾಗಿ ಸಾಗೋಣ ನಾವು ವರ್ಷಧಾರೆಯಾಗಿ


✍️ಸೂಗಮ್ಮ ಡಿ ಪಾಟೀಲ್
ಉತ್ನಾಳ್