ಮಗಳಿಗೊಂದು ತವರು ಬೇಕು

ಅಮ್ಮನ ಮನೆಯೊಂದಿರಬೇಕು
ಎಲ್ಲಿದ್ದರೂ ಹೇಗಿದ್ದರೂ
ಅಪರೂಪಕ್ಕೊಮ್ಮೆ ಬಂದು ವಿಶ್ರಮಿಸಲು
ತನ್ನೆಲ್ಲಾ ಭಾರಗಳ ಇಳಿಸಿಕೊಳ್ಳಲು
ಮಗಳಿಗೆ ತವರು ಮನೆಯೊಂದು ಬೇಕು ...

ಗಂಡ ಮನೆ ಮಕ್ಕಳು
ಅತ್ತೆ ಮಾವ ನಾದಿನಿ ಮೈದುನರು
ತುಂಬಿದ ಮನೆಯಿರಲಿ
ಗಂಡ ಹೆಂಡತಿಯೆಂಬ ಪುಟ್ಟ ಸಂಸಾರವಿರಲಿ
ಬಳಲಿದ ಮಗಳಿಗೆ
ತವರು ಮನೆಯೊಂದು ಬೇಕು ...

ಸಿರಿತನವೋ ಬಡತನವೋ
ವೈವಿಧ್ಯಮಯ ಭೋಜನವೋ
ರಾಗಿ ಅಂಬಲಿಯೋ ಉಂಡು
ಜಿಡ್ಡುಗಟ್ಟಿದ ನಾಲಗೆಗೆ
ಮತ್ತೆ ರುಚಿ ಬರಲು
ಅಮ್ಮನ ಕೈರುಚಿ ಸವಿಯಲು
ಮಗಳಿಗೆ ತವರು ಮನೆಯೊಂದು ಬೇಕು ...

ಹೊಂಗೆಯ ನೆರಳಂತಹ ತಂಪು
ತನುಮನಗಳು ಹಕ್ಕಿಯಂತಾಗಲು
ಅಮ್ಮನ ಒರಟು ಕೈಗಳ ಸ್ಷರ್ಷ ಬೇಕು
ಮಗಳಿಗೆ ತವರು ಮನೆಯೊಂದು ಬೇಕು
ತನ್ನ ಸಾಧನೆಗಳ ಹೆಮ್ಮೆಗಾಗಿ
ಬಿದ್ದುಎದ್ದ ನೋವುಗಳ ಶಮನಕ್ಕಾಗಿ
ಎದೆಯಲ್ಲಿ ಹೆಪ್ಪುಗಟ್ಟಿದ ಭಾವಗಳು
ಕರಗಿ ನೀರಾಗಲು
ಮಗಳಿಗೆ ತವರು ಮನೆಯೊಂದು ಬೇಕು ...

ಮಗಳು ಮಡದಿಯಾದಳು
ಅಮ್ಮನಾದಳು ಅತ್ತೆಯಾದಳು
ಅವಳೊಳಗಿನ ಹೆಣ್ಣು ಇನ್ನೂ ಬಾಲೆ
ಅವಳಿಗೂ ಒಂದು ಮಡಿಲಿನ ಬಯಕೆ
ಮಗಳಿಗೊಂದು ತವರು ಬೇಕು....!!