Daale joote-patloon,
Nikla kasbe ki galiyon se.
Baag tak pahucha, mehfil thi bemisaal
Rangeen phoolon aur kaliyo se.
Kaafi khushaal, vahan nanhe dehshat-gardon ki chehek thi.
Saath hi poore baag mein mohak pushpon ki mehek thhi.
Paas hi thha ek taal, ati-vishaal.
Paani mein chaaro or kai kamal khile thhe.
Vaha dekha toh log picnic mana rahe thhe, kuchh haath mila rahe thhe
Kuchh mitra kaafi samay ke baad mile thhe
Phir aage badh gaya mein vahan se,
raundte hue ghaas aur bikhre patto ko
Peeche chhor kar itrati gayen
Aur awaara kutto ko.
Thodi dur hi gaya toh dekha
Ek mayyat guzar rahi thhi,
Vahan chand palo mein kuchh paashindo ki zindagiyan bikhar rahi thhi
Sabki aankhe nam, chehro se tapakta gham
Bhor lagi doobne, aur raat ki chhaya ubhar rahi thhi.
Pata nahi kaun thha, jo jeevan ka daaman baandhe udd chala.
Meine jooton ke pheete kase,
Aur ghar ki or mud chala.




© amey_zing