ਝੂਠਾ ਜਿਹਾ ਹਰ ਚਿਹਰਾ ਅੱਜਕਲ੍ਹ
ਅਸਲੀ ਚਿਹਰੇ ਛੁਪਾਏ ਜਾ ਰਹੇ
ਕਈਆਂ ਨੇ ਮੁਖੋਟੇ ਆਪ ਪਹਿਨ ਲਏ
ਕਈਆਂ ਨੂੰ ਪਹਿਨਾਏ ਜਾ ਰਹੇ

ਇਕ ਮੁਖੋਟਾ ਮੈਨੂੰ ਵੀ ਕੋਈ
ਹੱਥ ਲੰਮਾ ਕਰਕੇ ਫੜਾ ਰਿਹਾ
ਤੇ ਮੁਖੋਟਾ ਮੈਨੂੰ ਫੜਾ ਕੇ
ਮੁਖੋਟਾਧਾਰੀ ਮੁਸਕਰਾ ਰਿਹਾ

ਮੁਖੋਟਾ ਫੜ ਤਾਂ ਲਿਆ ਹੈ
ਪਰ ਪਾਇਆ ਨਹੀਂ ਮੈਂ
ਹਿੰਮਤ ਨਹੀਂ ਹੈ ਮੋੜਨ ਦੀ
ਮੋੜਨਾ ਤਾਂ ਚਾਹਿਆ ਮੈਂ

ਕੀ ਕਰਾਂ ਇਸ ਮੁਖੋਟੇ ਦਾ
ਪਾ ਲਿਆਂ ਜਾਂ ਭੰਨ ਦਿਆਂ
ਤੇ ਮੁਖੋਟਾ ਵੰਡਣ ਵਾਲੇ ਹੱਥਾਂ ਨੂੰ
ਵੱਢ ਦਿਆਂ ਜਾਂ ਬੰਨ੍ਹ ਦਿਆਂ

ਪਰ ਇਸ ਸਮਾਜ ਵਿੱਚ ਰਹਿਣ ਲਈ
ਜ਼ਰੂਰੀ ਹੈ ਮੁਖੋਟਾ ਲਾਉਣਾ
ਜਿਸ ਬੰਦੇ ਕੋਲ ਮੁਖੋਟਾ ਨਹੀਂ
ਉਹ ਕਮਲਾ ਨਾਦਾਨ ਤੇ ਇਆਣਾ

ਹਰ ਕਿਸੇ ਦੀ ਨਜ਼ਰ ਵਿੱਚ
ਮੁਖੋਟਾ ਲਾਉਣਾ ਸਮਝਦਾਰੀ ਹੈ
ਮੁਖੋਟਾ ਲੱਥ ਜਾਣ ਦਾ ਡਰ
ਹਰ ਕਿਸੇ ਤੇ ਹਾਵੀ ਹੈ
© Harpreet kaur issar