നിങ്ങൾ വരുമ്പോൾ
കസവുടയാടകൾ അണിഞ്ഞുവരണം
തലയിൽ പൂചൂടി
സുഗന്ധദ്രവ്യങ്ങൾ പൂശണം

എന്റെ മുഖം തുണികൊണ്ട് മൂടരുത്
സാംബ്രാണി പുകയ്ക്കരുത്
എണ്ണിപ്പെറുക്കി കരയരുത്
എനിക്കത് ശ്വാസംമുട്ടുണ്ടാക്കും

എന്റെ നന്മയെ വാഴ്ത്തരുത്
സ്വഭാവ മഹിമയെ പുകഴ്ത്തരുത്
എന്റെ മക്കളോടെന്നെ കുറിച്ച് മിണ്ടരുത്
എനിക്ക് ചുറ്റും മൂകമായിരിക്കരുത്

എന്റെ തിന്മകളെക്കുറിച്ചു ചർച്ച ചെയ്യൂ
എന്നിലെ പോരായ്മയെ പഴിക്കൂ
ജീവിച്ചിരുന്നിരുന്നെങ്കിലും പ്രയോജനമൊട്ടുമുണ്ടാകില്ല
എന്നുറക്കെ പ്രഖ്യാപിക്കൂ

എന്നിലില്ലാതിരുന്ന നന്മ ചാർത്തി തരാതിരിക്കുക
അവസാനം പൊതിയുമ്പോൾ അത്തർ കുടയാതിരിക്കുക
എന്റെ സ്വഭാവമെന്നിൽ ചൊരിയുന്ന
സുഗന്ധമത് മതിയെനിക്ക്

എന്നെ വെറുക്കുക
എന്നെ മറക്കുക
കബറിങ്കൽ വെയ്ക്കുമ്പോൾ
ഒരു പിടി മണ്ണെറിയുക

എന്റെ മഞ്ചൽ തോളിലേറ്റുമ്പോൾ
എന്റെ ശരീരഭാരത്തെക്കുറിച്ചു പരസ്പരം പറഞ്ഞു ചിരിക്കുക
ഒറ്റയ്ക്കുറങ്ങാൻ ഒടുവിൽ പോകും മുന്നേ
ഞാനുമതൊന്ന് കേട്ട് നിശബ്ദയായി ആർത്ത് ചിരിക്കട്ടെ !!
© sabi