ಅರಳಿದ ಹೂವಲಿ ದುಂಬಿಯ ಝೇಂಕಾರ
ಇನಿಯನ ಎದೆಯಲಿ ಪ್ರೀತಿಯ ಸಂಚಾರ
ನನ್ನೀ ಮನದ ಮುಗಿಲ ಹುಣ್ಣಿಮೆ ಚಂದಿರ
ಬಾಳಲಿ ಭರವಸೆ ಹೊತ್ತು ಬಂದ ಹಮ್ಮೀರ...

ಮನದಂಗಳದ ಮೆರಗು ನನ್ನ ರಾಜಕುಮಾರ
ಹೃದಯಂಗಳದ ಉಸಿರಿಗಿವನೇ ಸೂತ್ರಧಾರ
ಬದುಕನು ರಂಗೇರಿಸಿ ಸಿಂಗರಿಸಿದ ಕಲಾಕಾರ
ಜೀವನ ರಂಗಮಂದಿರಕೆ ಮುಖ್ಯ ಪಾತ್ರಧಾರ...

ನನ್ನಾಸೆಗಳು ಹುಸಿಯಾಗದಂತೆ ಕಾಯುವವ
ಕಂಗಳ ಹೊಳಪಾಗಿ ನಿತ್ಯ ದಾರಿ ತೋರುವವ
ನನ್ನಯ ಹೃದಯಕೆ ಅರಸನಾಗಿ ವಾಸಿಸುವವ
ಮುಗುಳುನಗೆ ಮಂಟಪಕೆ ಮಾಲೀಕನಾದವ...

ಜಗದ ಜಾತ್ರೆಯಲಿ ಪ್ರೀತಿಯನೇ ಹಂಚುವವ
ಮನದ ಕೇರಿಯಲಿ ನಿತ್ಯ ನನ್ನನೇ ಜಪಿಸುವವ
ಕರಪಿಡಿದು ಜೊತೆ ನಡೆವಾಗ ಕಳೆ ತುಂಬುವವ
ಎದರು ನಿಂತು ಎದೆಬಡಿತವನು ಹೆಚ್ಚಿಸುವವ...

#Kannada #kannadapoem #vijaykumarvm #ವಿಬೆಣ್ಣೆ

© ವಿಜು ✍ 💞