Ndithi mandityatyadule ndibhetsisa ngentombi yaseMazangweni,Ooncuthu.ookhwalo,Oomlanjana!
Ukwenjenje ndibhodla ndimchuba ngochulumanco umzukulwana wasemaNgxongweni,ooMadiba,oSophitsho,ooNgqolomsila,oYem-yem,ooVela bambhantsele,ooCeduma,ooHala,ooNgxeko,ooDlomo ndithetha ngabathembu belizwe ntoyakuthi

Intombi eyandithwala inyanga ezilithoba wava inimba ngam
Ndiyilento ndiyiyo nguwe
Isimilo sam sinje nje kukuqwaqwadwa nguwe
Ebusuku ndilala ndityile ngenxa yakho ngob'abaninzi balala ngamanzi

Awu!gxalaba lam lokulilela xa kungathi ilizwe lindiflathele
Bhatyi yam yasebusika
ndiswelamagama ombulelo ngoba ondenzele kona kugabadele

Intombi ebithi nokuba imimoy'ebhudlayo iyaqhwitha ingazinzi ihlal'imenkqo ixel'umthi owawumiselwe phezu komjelo wamanzi
Umakad'enethwa engenabhatyi
Umdak'omnyama ongeva sepha
Imbokodo yam madoda

Uzuqaqambe nkwenkwezi yam nangakumbi
Ndiyakuthembisa ndizokwenza konke endinako nje ngambulelo wam ujolise kuwe

Ukuba nozala ndingabendibhenca ubuwena ndoswel'usib'inene.

Ndiyakuthanda mama.

© Zikhona Kondile