ಭರವಸೆಯ ಹಾದಿಯಲಿ ಸಾಗಿದೆ ಬದುಕಿನ‌ ಪಯಣ
ತಲುಪಬೇಕು ಸಹನೆಯಿಂದ ನೆಮ್ಮದಿಯ ನಿಲ್ದಾಣ
ಅನುಭವಿಸುವ ಕರ್ಮದ ಫಲಗಳೆ ಪರಿಸ್ಥಿತಿಗೆ ಕಾರಣ
ಕಟ್ಟಿಕೊಡುವುದು ಬಾಳಿಗೆ ಅನುಭವಗಳ ಅದ್ಭುತ ಚಿತ್ರಣ ||1||

ಬಣ್ಣದ ಭಾವನೆಗಳೆ ಸುಂದರ ಬದುಕಿಗೆ ಜೀವಾಳ
ಚಿಂತೆಗಳ ಮೂಟೆ ಸಂತೆಯಲ್ಲಿರಿಸಿ ಜೀವಿಸಿದರೆ ಮನಸ್ಸು ನಿರಾಳ
ಸಂಕಷ್ಟಗಳಿಗೆ ಅಂಜಿ ಹಿನ್ನಡೆದರೆ ಜೀವನ ಕರಾಳ
ನಂಬಿಕೆಯೊಂದಿಗೆ ಮುನ್ನಡೆದರೆ ಬದುಕು ಅತ್ಯಂತ ಸರಳ ||2||

ಸತತ ಪ್ರಯತ್ನಗಳ ಗೆಲುವಿಗೆ ಭರವಸೆಯೆ ಆಸರೆ
ಸರ್ವರನ್ನು ಆದರಿಸುತ್ತ ಸೋಲಬೇಕು ಒಲವಿಗೆ ಕೈಸೆರೆ
ನೋವು ನಲಿವನ್ನು ಸ್ವಾಗತಿಸುತ್ತ ಜೀವಿಸಬೇಕು ಮನಸಾರೆ
ಸೃಷ್ಟಿಯನ್ನು ತನ್ನೊಡಲಲಿಟ್ಟು ಪೋಷಿಸುತ್ತಿರುವಳು ವಸುಂಧರೆ ||3||

ನೋವು ನಲಿವುಗಳು ಮನಸ್ಸನು ಬಲಗೊಳಿಸುವ ಪ್ರೇರೇಕಗಳು
ಸೋಲು ಗೆಲುವು ಸ್ವೀಕರಿಸುವ ಜೀವನದ ಪರೀಕ್ಷೆಗಳು
ಉತ್ತಮ ಆಲೋಚನೆಗಳೆ ಬದಲಾವಣೆಯ ಬದುಕಿಗೆ ಕಾರಣಗಳು
ನೆನಪಿನ ಬುತ್ತಿಯನ್ನು ಹೊತ್ತೊಯ್ಯುವ ಅದ್ಭುತ ಕ್ಷಣಗಳು ||4||

ಬವಣೆಯ ನಿವಾರಿಸಲು ಭರವಸೆಯ ಹಣತೆಯ ಹಚ್ಚಬೇಕು
ಕನಸುಗಳನ್ನು ಕಾಣಲು ಬಯಕೆಗಳ ಹೊತ್ತು ಸಾಗಬೇಕು
ಎದುರಾಗುವ ಸವಾಲುಗಳನ್ನು ಧೈರ್ಯದಿ ಸ್ವೀಕರಿಸಬೇಕು
ಜವಬ್ದಾರಿಗಳನ್ನರಿತು ನಿತ್ಯ ಹೋರಾಡುತ್ತ ಬದುಕಬೇಕು ||5||

ನಿತ್ಯವು ಬೆಳಗುತ್ತಿರಲಿ ಮನದಲ್ಲಿ ಭರವಸೆಯ ದೀಪ್ತಿ
ಗುರಿ ಸಾಧಿಸಿಗಳಿಸು ಎಲ್ಲರೂ ಮೆಚ್ಚುವಂತ ಕೀರ್ತಿ
ಮಾನವೀಯ ಮೌಲ್ಯಗಳ ಅನುಸರಣೆ ಒಳ್ಳೆಯ ನೀತಿ
ಸಮನ್ವಯದಿ ಬೆರೆತು ಸಂತಸದಿ ಸಂಪಾದಿಸು ಎಲ್ಲರ ಪ್ರೀತಿ ||6||

ಭಾವನೆಗಳನ್ನರಿತು ಪ್ರೀತಿಯಿರದ ಬದುಕು ನಿಸ್ಸಾರ
ಕೊರಗುವ ಮನಸ್ಸಿಗೂ ಮಂದಹಾಸ ಬೀರುವ ಆತುರ
ಬಡಿಯುವ ಹೃದಯಕ್ಕೂ ಅರ್ಥೈಸುವ ಮನಸ್ಸಿಲ್ಲದೆ ಬೇಸರ
ಬಾಳ ಬೆಳಗಿಸಲು ಬಂದೆ ಬರುವನು ಮೂಡಣದಿ‌ ನೇಸರ ||7||
✍️ಶೃತಿ ಶೈವ

#WritcoQuote#writcoapp#Writer#Writco#shruthishaiva#Writcopoem#ಭರವಸೆಯೆಬದುಕಿಗೆಬೆಳಕು#ಭರವಸೆ#ಬೆಳಕು#ಬದುಕು