ಭಾವ ವರ್ಷ

ಬಿಂದು ೧೨

ಸಲಹೌ ಕರುಣಾನಿಧಿ

ಕ್ಷೀರಸಾಗರದಿ ಪವಡಿಸಿಹ ಶ್ರೀ ಹರಿಯೇ
ಕಾರುಣ್ಯ ತೋರಿ ಸಲಹಯ್ಯ ಎನ್ನ ॥ಪ॥
ಧಾರಿಣಿಯು ಶ್ರೀದೇವಿ ಸೇವಿಸುತಲಿರೆ
ಮೂರು ಲೋಕವ ಪಾಲಿಸಯ್ಯ ಮುನ್ನ॥ಅ.ಪ॥

ಹತ್ತು ವಿಧ ಅವತಾರವೆತ್ತಿ ಬಂದವನೇ
ಸುತ್ತೇಳು ಜಗವಾಳೋ ದೊರೆಯೇ
ನಿತ್ಯವೂ ನಿನ್ನನೇ ಧ್ಯಾನಿಪ ಹಾಗೇ
ಮಿಥ್ಯದೀ ಮಾಯೆ ತೆರೆ ಸರಿಯೇ ॥೧॥

ಭಕ್ತಿ ಮಾರ್ಗದಿ ಸಾಗುವಾ ಮತಿಯಾ
ಶಕ್ತಿಯನು ನೀಡುತಾ ನಡೆಸುಬಾರಯ್ಯ
ಯುಕ್ತಿ ಪೌರುಷದಿ ವ್ಯರ್ಥವಾಗದ ಹಾಗೆ
ಮುಕ್ತಿಯನು ದಯೆಯಿತ್ತು ಈಯಯ್ಯ ॥೨॥

ನಿರತವು ನಡೆಸುತಾ ನಿನ್ನ ಭಜನೆ
ಅದುವೆ ಆಗಲಿ ಬಾಳ ಸಾಧನೆ
ನಿನ್ನ ಸಾಸಿರ ನಾಮಗಳ ಪಾಡುತಲಿ
ಧನ್ಯತೆಯಲಿ ನನ್ನ ಬಾಳು ಕಳೆಯಲಿ॥೩॥

ಸುಜಾತಾ ರವೀಶ್
ಮೈಸೂರು
೨೧.೧೧.೨೦೨೨