ನನ್ನವನು..!
====❣️====
ಒಲವಿನ ಆಂತರ್ಯದಲಿ ಸದಾ ನಲಿಯುವ ಪ್ರಣಯಿ.
ನನ್ನೆದೆಯಲಿ ಆಸೆ ಚಿಗುರಿಸಿ ಮುಗ್ಧತೆಯ ಮಗುವಂತೆ ಪ್ರೀತಿಸುವ ಧೀಮಂತ ಹೃದಯಿ.
ಎಂದಿಲ್ಲದ ಮೋಹ ಅವನ ಕಂಗಳಲಿ,
ಅಪೂರ್ವ ದಿವ್ಯ ಚೇತನ ತುಂಬಿದೆದೆಯಲಿ
ಮೈಮರೆಸುವ ಸೊಬಗಿನ ಮೋಹಕ ಮಧುರತೆಯಲಿ
ಮೃದು ಹೃದಯದ ನಿಜಪ್ರೇಮದ ಚೈತನ್ಯಮೂರ್ತಿ ನಲ್ಮೆಯಲಿ ||1||

ಮುದ್ದು ಮೊಗದ ಅಂದದ ಚೆಲುವ,
ಚೆಂದದಲಿ ನುಡಿಯುವ ಅವನೊಲವ,
ತುಂಟ ನಗೆ ಸೂಸುವ ಇನಿಯ,
ಮುಗುಳ್ನಗೆ ಬೀರುತ ಬರುವನು ಸನಿಹ
ಸೋತು ಹೋದೆನು ಅವನಂದಕೆ !
ಕೊಡುವೆ ನಿತ್ಯ ಪ್ರೇಮಕಾಣಿಕೆ ||2||

ಪೆದ್ದು ಪೆದ್ದಾಗಿ ಅವನಾಡುವ ಮಾತು
ಸದ್ದು ಮಾಡದೆ ಮತ್ತೇರಿಸುವ ಮುತ್ತು
ನನ್ನ ಬಾಳಿಗೆ ಸಿಂಧೂರತಿಲಕವಿಟ್ಟ ಗರಿಮೆ
ನನ್ನೊಲವಿಗೆ ಅವನ ಐಸಿರಿಯೇ ಹಿರಿಮೆ !
ಯಾರಿವನೆಂದು ಮನದಲ್ಲಿ ಕಾಡುತಿರೆ
ನನಗಾಗಿ ಹುಟ್ಟಿ ಬಂದವನೆಂದು ಹೇಳುತಿರೆ ||3||

ಹೃದಯ ಮಿಡಿಯುತಿದೆ ಅವನ ಬಾಹು ಬಂಧನದಲಿ
ಸಿಕ್ಕಿ ಸೆಳೆದೊಯ್ಯುವಾಗ
ಭಾವಗಳಲ್ಲಿ ಬಂಧಿಸಿ ಮುದ್ದಿಸುವಾಗ ತುಟಿಯಂಚಿನ
ನಗುವಲ್ಲಿ ಮುತ್ತಿಕ್ಕಿ ಓಲೈಸುವಾಗ
ಜೀವ ಭಾವದೊಲುಮೆಯಲಿ ಆಸೆಯ ಹೂ ಚೆಲ್ಲಿ
ಆದರಿಸುವೆ.
ಆಲಿಂಗನಾವರ್ತದಲಿ ತೆರೆದಿದೆ ಈ ಹೃದಯ ಕಾಯ್ದಿಟ್ಟ
ಅವನೊಲವ ಪ್ರೀತಿಯ ಸ್ವೀಕರಿಸುವೆ ||4||

ಮಧುರಾತಿಮಧುರ ಭಾವದಲಿ ಎಳೆದೊಯ್ಯುತಿದೆ
ನಮ್ಮಿರ್ವರ ಬಾಂಧವ್ಯಕ್ಕೆ ಈ ಜಗವೇ ಪ್ರೇಮ ಸಾಕ್ಷಿಯಾಗಿದೆ. ಮುಗಿಲೆತ್ತರಕ್ಕೂ ಕೈಬೀಸಿ ಕರೆಯುತಿದೆ
ಒಲವಿನಾಲಿಂಗನಕೇ...!
ನನ್ನೆಲ್ಲಾ ಆಸೆ ಕನಸುಗಳಿಗೆ ಸ್ಫೂರ್ತಿ ತುಂಬುವ ಚೆಂದದ
ಚೆಲುವನವನು ||5||

ಸವಿದ ನೆನಪುಗಳ ಸಪ್ತ ಭಾವಗಳ ಜೊತೆ ನೆಲೆನಿಂತಿದೆ
ತನ್ನೊಳಗಿನ ಪ್ರೇಮವ ಆಕೃತಿಯಾಗಿಸಿ ಎದೆಯಲಿ
ಅಚ್ಚಳಿಯದೆ ಅವನ ರೂಪವೆ ಸ್ಥಿರವಾಗಿದೆ
ನನ್ನೀ ಮೊಗದಲ್ಲಿ ನಗು ಅರಳಿಸಿದ ನಲ್ಮೆಯ ನಾವಿಕನು
ಬಾಳ ಬದುಕಿಗೆ ಬೆಳಕಿನ ಕಿರಣವಾಗಿ ಪ್ರಜ್ವಲಿಸುವನು
ಅವನೇ..
ನನ್ನವನು.. ನನ್ನವನು..ನನ್ನವನು ||6||
❤️ಸುಮನ್ ಹೆಚ್ ಸಿ ❤️