2 saal pehle jab hum Bihar ke ek chote se sheher se uth ke Bangalore aaye, tab hamein kya pata tha ki hamare saath bhi aisa hoga...hum toh aaye the yeh soch kar ki bada kaam karenge, bada naam karenge, employee of the year banenge...lekin tab hamein kya pata tha ki hum kabhi uss subject pe kitaab likh rahe honge jiski kabhi lecture bhi attend nhi ki thi…likhne ka keera toh bachpan se tha, lekin hamein kya pata tha kabhi hum khud ek kahaani ban jaayenge…

Usey jab pehli baar dekha tab hum bench pe the..."project mein woh thi, lekin laga kaam hamein mil gaya hain...!!"

"Woh Company ka pehla tohfa tha hamaare liye...!!"

Har waqt usi k baare mein sochte rahte the...chhup chhup k dekhte rahte the... dusre location pe project milta tha, toh bol dete the - "sir, mere skill set aapke pjt requirements se match nhi karte, phir bhi aap risk lena chahte toh mujhe le lo apne pjt mein"...woh bhi sochte ki jise khud pe bharosa nhi woh bhala hamare client ka bharosa kya jeet paayega...!!

Phirr jab HR beech mein aaya toh maine ek pjt join kiya, lekin apni location nhi badalne di...abb itni toh pahuch aur pakad ho hi gayi thi hamari...pyaar karne waale kabhi darte nhi, jo darte hain woh pyaar karte nhi…aur dosto – “ladki aapko kahi bhi le jaa sakti hain, toh kahin par rok kar rakh bhi sakti hain...!!”

Har roz ki tarah ek din jab woh cafetaria aayi apne dost k saath chai peene ko, toh mai socha ki bol du - "Ae chaiwaale, paisa nhi lena madam se, bhabhi hai tumhari...!!"… lekin nhi bola, bura maan jaati woh...waise bhi abhi “hamara jawaan hona baaki tha, abhi TL (true lover) banna baaki tha...!!”

mere supervisor ko jab pata chala yeh sab, toh bahut chillaya mujh pe...bolne laga ki - "waah hero, itne mahenge resource ho tum...lekin paise tum iss project k khaao, aur ishaqbaazi dusre pjt mein ladao...!!”

dekhte dekhte 7-8 months ho gaye...par usne mere pyaar ko sweekar hi nhi kiya..."matlab mera pyaar naa hua, complex algebra ka sawaal ho gaya... samajh hi nhi rahi thi woh meri...!!"

aaj jab mein yeh company chhor raha hu…aaj jab mujhe lag gaya ki woh nhi maanegi mere pyaar ko…aaj jab har woh lamha sata raha hai jo ussey chat karne mein hamne bitaaye, toh samajh mein aa raha hain ki "kaam pjt mein bhi tha, kaam bench pe bhi tha, lekin hum pyaar mein andhe...hamein kuch dikha hi nhi kabhi sivay aashiqui ke, sivay uske...aur kaam toh hum kab ka bhul gaye the, saath mein naam bhi bhul gaye...!!"

Shaayad aaj agar woh haan keh de toh mai ruk jaau, Company chhod ke naa jaau, phir se Aashiqui mein pad jaau...lekin nhi...abb nhi...abb intezaar nhi kar sakta mai...

Abb kaun phirr se itni mehnat kare...kaun apne sharif dost ke log-in credentials use karke uski lync status check kare iss soch mein ki usne uske liye kuch accha likha hoga apne note pe...kaun pyaar mein khud ko iss tarah badal de...kaun apne 13 saal puraane aankhen badal de (spects to lens)...kaun itne creams lagaye - nose k liye alag, cheeks k liye alag, lips k liye alag, under eye k liye alag...kaun subaah aur shaam gym jaaye, protein powder piye, itna dher saara khaana khaaye...kaun aisi matlabi duniya mein kisi k liye itni deewangi dikhaye...kaun har waqt office mein kisi ek ka intezaar kare ki kab uske darshan ho, kab woh smile kare, kab zindagi mile...kaun pyaar mein cold-drinks tyaage...kaun kare itna...

nhi karna dosto...nhi banna mere jaisa...koi faayda nhi...itna kuch karne k baad bhi ladki nhi maani dosto...sach mein - "corporate sector ke ladko ka pyaar aksar school aur college waale utha k le jaate hain..."

mai samajh gaya ki mai hi panauti ho...uss ladki ko bhul jaana namumkin tha isliye khud ko iss company se dur kar raha hoon...abb shaayad iss janam mein toh nhi maanegi woh...iss baar toh ek state k hain...lekin agle janam mein ek hi town k honge...aur hum phirr shuru se lag jaayenge...ek hi school mein padhenge, ek hi college mein jaayenge...phirr koi beech mein aaya toh usey samjha bhi denge ki dekh beta - abhi pichle janam ka hisaab baaki hain, tu line mein lag jaa, agle janam mein try karna..."aur agarr phir bhi koi aaya beech mein, toh mai bura maan jaaunga !!"

lekin abb mein thak gaya hu dosto intezaar karte karte...bas dosto alvida...agle janam mein woh meri hai...abb yeh toh vaada raha - khud se, khuda se, uss ladki se, puri kaaynaat se..."

chalta hu - duey mein naam yaad rakhna...