നീ എപ്പോഴെങ്കിലും
എന്നെ പ്രണയിച്ചിട്ടുണ്ടോ ?
ആത്മാർത്ഥമായി എന്നെങ്കിലും
"നിനക്ക് ഞാനില്ലേ "
എന്ന് മൊഴിഞ്ഞിട്ടുണ്ടോ ?
എന്നിലെ ചുവപ്പിന്റെ
വേദനയിൽ പുളയുമ്പോൾ
ഒന്നെന്നെ തഴുകിയിട്ടുണ്ടോ ?
ആർദ്രമായി എൻ നെറുകെയിൽ
ഒരു ചുംബനം നൽകിയിട്ടുണ്ടോ ?
നിന്റെ ഉന്മാദത്തിൽ
നീ എന്നെ പ്രാപിക്കുമ്പോൾ
എന്റെ മനസ്സ് നീ അറിയാൻ
ശ്രമിച്ചിട്ടുണ്ടോ ?
ഏകാന്തതയിൽ
വീർപ്പുമുട്ടിയ ദിനങ്ങളിൽ
ഒന്നെന്നെ ചേർത്തുപിടിച്ചിട്ടുണ്ടോ ? അടുക്കളയിലെ പുകയിൽ
എരിഞ്ഞു തീർന്ന
എന്റെ സ്വപ്നങ്ങളെ
നീ അറിഞ്ഞിരുന്നോ ?
എന്നെങ്കിലും എന്നെ
ഒന്നടുത്തിരുത്തി
ചിരിച്ചെന്നോട് സംസാരിച്ചിട്ടുണ്ടോ ?
ഇരുണ്ട മുറിയിലെ
ഒറ്റപ്പെടലിലേയ്ക്ക്
ഞാൻ വഴുതി വീണപ്പോഴെങ്കിലും
ഒന്നെന്നെ ചേർത്തുപിടിയ്ക്കാമായിരുന്നില്ലേ
നിനക്ക് ...............................?
ആരോടെന്നലാതെ അവൾ
മൊഴിഞ്ഞു..
അലസമായ മുടിയിൽ
വിരലോടിച്ച്
അവൾ ഉറക്കെയുറക്കെ
ചിരിച്ചു.
അവളിലെ
കാലിലെ ചങ്ങലകിലുക്കത്തിൽ
ആ ചിരി പ്രതിധ്വനിച്ചു.........................(നിമ്യ)