ಒಲವಾಗಬಹುದೇ ಈಗಲೂ
ಹುಡುಗ ನಿನಗೆ.....???

ಬಾನು ಭೂವಿ ,ಕಡಲ ಚಂದ್ರರ ಪ್ರೀತಿಯದು
ಸೇರದಲೆಯೇ ಸಾಗಬೇಕು ನಾನು ಭೂಮಿ ನೀನು ಬಾನು ನಡುವೆ ಕೈಯ ಸೇತುವೆ ಕಟ್ಟಬೇಕು ಆದರು ಹುಚ್ಚು ಒಲವು ಸನಿಹವಿದ್ದರು ಕೊನೆಯಿಲ್ಲದೇ ಕಾಯುವುದರಲ್ಲೇ ನಿರಂತರ ಹರಿಯಬೇಕು...!!!
ಇಂತ ನನ್ನ ಕೆಲವು ಹುಚ್ಚುಚ್ಚು ಕಲ್ಪನೆಯ ಕೇಳಿದ ಮೇಲು ಒಲವಾಗಬಹುದೇ ಹುಡುಗ ನಿನಗೆ...??
★
ಕಾಗದದ ದೋಣಿ ಹಿಡಿದು ಆಡುವವರ ನಡುವೆ
ಅದೇ ಭಾವಗಳ ದೋಣಿಯೇರಿ ಅದೇ ಕಾಗದದಲಿ
ತೇಲುವವಳು ನಾನು..;ಕೊಡೆಹಿಡಿದು ಬರಬೇಡ ನನ್ನ ಚಿಕ್ಕ ಪುಟ್ಟ ಮಗುತನದ ಬಯಕೆಗಳಿಗೆ ಆ ಮನದ ಬಯಕೆಗಳಿಗೆ ಕೈಯ ಹಿಡಿದು ಜೊತೆ ನೆನವುದಾದರಷ್ಟೇ ಹೆಜ್ಜೆ ಹಾಕು..
ಇಂತ ನನ್ನ ಬಾಲಿಶತನವೇನಿಸುವ ಕೆಲವು
ಬುದ್ದಿಯ ನೋಡಿದ ಮೇಲು
ಒಲವಾಗಬಹುದೇ ಹುಡುಗ ನಿನಗೆ....??
★
ಮಳೆಯ ಮೌನ ರಾಗಕ್ಕೂ,ಪ್ರಕೃತಿಯ ಮೂಕ ಭಾವಕ್ಕೂ
ನಿರ್ವಾತದ ಖಾಲಿತನಕ್ಕೂ ಕೂಡ ದನಿಯಾಗುವ ನನಗೆ
ನನ್ನ ಮನದ ಮಾತುಗಳಿಗೆ ಮಾತ್ರ ದನಿಯಾಗಲಾರದು.., ಆ ಪಿಸುಮಾತುಗಳಿಗೂ ಆ ಮೌನ ಭಾವಕ್ಕೂ ನೀ ಧ್ವನಿಯಾಗಬೇಕು ನಿನ್ನ ಮಾತಿಗೆಲ್ಲಾ ನಾ ಮರುಳಾಗಿ ಹೋಗಬೇಕು ನನ್ನ ಮೌನ ಕೂಡ ಮತ್ತೆ ಮತ್ತೆ ನಿನ್ನೊಂದಿಗೆ ಮಾತಾಡುವಂತೆ....,
ಕೆಲವೊಮ್ಮೆ ತೀರಾ ಹುಚ್ಚೆನಿಸುವ ನನ್ನ ಇಂತಹ
ಭಾವನೆಗಳ ಕಂಡ ಮೇಲು
ಒಲವಾಗಬಹುದೇ ಹುಡುಗ ನಿನಗೆ...??
★
ನೀರವತೆಯ ಕಾನನದಲ್ಲೂ, ನಟ್ಟಿರುಳ ರಾತ್ರಿಯಲ್ಲೂ,ಕಡಲಲೆಯ ಸದ್ದಿನಲ್ಲೂ ಮೌನವ ಅರಸಿ ಅಲೆವವಳು ನಾನು ಅಂಕೆಯಿರದ ಅನಗತ್ಯ ತೋರಿಕೆಯ ಮಾತುಗಳಿಗಿಂತ ತಂಟೆಯಿರದ ಮೌನದ ಹಾದಿಯ ಕಾಲು ದಾರಿಯ ಸಂಘ ನನ್ನದು..,ಆ ನನ್ನ ಮೌನದ ಹಾದಿಯ ಜೊತೆಗಾರನಾಗುವೆಯಾ..,ನನ್ನ ಮಾತುಗಳಾಚೆಗಿನ
ಮೌನದ ಕಡಲ ತೀರ ಸಿಗದ ಮೇಲು
ಒಲವಾಗಬಹುದೇ ಹುಡುಗ ನಿನಗೆ...??
★
ಪ್ರೀತಿಯೆಂದರೆ ಮುಗಿವ ಯೌವ್ವನದ ಆಕರ್ಷಣೆಯಲ್ಲಾ ಅಮವಾಸ್ಯೆ ಚಂದಿರನ ಎದೆಯಲ್ಲೂ ಬೆಳಗೊ ನಕ್ಷತ್ರದಂತಹದೇನೋ..,ಭಯದಲ್ಲಿ ನಡುಗಿಸುವ ನಟ್ಟಿರುಳಲ್ಲಿ ಭೂವಿಯ ಬಳಸುವ ಬೆಳದಿಂಗಳಂತಹದೇನೋ ಹೀಗೆ ಎಂದು ವ್ಯಾಖ್ಯಾನಿಸಲಾಗದು ನನಗೆ..,ಥೇಟ್ ಖಾಲಿ ಹಾಳೆಗಿಳಿದ ಅಕ್ಷರಗಳಂತಹವು ಅವು ಓದುಗರು ಅರ್ಥೈಸಿಕೊಂಡ ಭಾವಗಳಂತಹವೇ ಅದರ ರೂಪ..,ಕಾರಣವಿಲ್ಲದೇ ಪ್ರೀತಿಸಿ ಬಿಡಬೇಕು,ಮೌನಕ್ಕು ನಸುನಗುವಿಗೂ ಸದ್ದಿಲ್ಲದೇಯೆ ಒಲವಾದಂತೆ..,ಅದರ ಅಂತರಂಗದ ಮಿಳಿತಗಳೇ ಬೇರೆ
ಬರಿ ಮಾತಿಗಂತು ಅದು ನಿಲುಕುವುದಿಲ್ಲಾ ವರ್ಣನೆಗೂ ದಕ್ಕುವುದಿಲ್ಲ ಬರಿತೆ ಅನುಭವಿಸಬೇಕು ಆರಾಧಿಸಬೇಕು.

★
ಸುಮ್ಮನೆ ಹಾಗೆ ಪ್ರೀತಿಯೆಂದರೆ ಹೀಗೆ ಹೊರಟು ಬಿಡು ನೀ
ಇಲ್ಲ ನನ್ನ ಇಂತಹ ಹುಚ್ಚುತನದ ಅಂತರಂಗದಭಾವಕ್ಕೂ ಜೊತೆಯಾಗುತ್ತಿಯಂದರೆ ಮೌನದಿಂದಲೇ ಪಕ್ಕ ನಡೆದು ಬಾ
ಬಾಹ್ಯ ಬದುಕಿಗಲ್ಲಾ ಅಂತರಂಗದ ಬದುಕಿಗೆ ಜೊತೆಯಾಗಿ ಬಾ..,ರಹದಾರಿಯಲ್ಲದಿದ್ದರೂ ಮಣ್ಣ ಹಾದಿಯಲ್ಲಾದರು ಒಲವ ಹೆಜ್ಜೆ ಗುರುತಾ ಮೂಡಿಸುವ ಜೊತೆಯಾಗಿ..,
ನಾನೊಂತರ ಹುಚ್ಚು ಹುಡುಗಿ ಗುಲಾಬಿ ಮಲ್ಲೆಗೆಯ ಹಿಡಿದು ಬರಬೇಡ ಅದರ ಘಮಲಿಗೆಲ್ಲಾ ಬಿರಿಯಲಾರೆ ನಾ..,ಕೈ ಸೋಕದೆ ಹೃದಯ ಸೋಕುವ ಘಮವಿಲ್ಲದಿದ್ದರು ಕಾಡ ಕುಸುಮದ ಮುಗ್ಧತೆಗೆ ಅರಳುವವಳು ನಾನು..,ಅಂದ ಚಂದದಿಂದಲ್ಲಾ ಹಾಗೇ ಸುಳ್ಳು ಸುಳ್ಳು ಹೋಲಿಕೆಯ ಮಾತುಗಳಿಂದೆಲ್ಲಾ ನಾ ನಿನ್ನ ಕಾಡಿಸಲಾರೆ ಆದರು ಒಮ್ಮೊಮ್ಮೆ ಕಾಡಬಹುದೇನೋ ನಿನ್ನ ನಾ.., ಇಂತಹ ನನ್ನ ಕೆಲವು ಹುಚ್ಚುತನಗಳಿಂದಲೇ ಹುಡುಗ..,
ನೀ ಕೊಟ್ಟ ನವಿಲುಗರಿಯ ಒಲವಿಗಲ್ಲದಿದ್ದರು
ನೆನಪಿಗಾಗಿ ಕೂಡಿಡುವ ಭಾವತೀತ ಮರುಳೆ ನಾನು...‌!!!
ಹೇಳು ನಿನಗೆ ನನ್ನ ಮೇಲೆ ಈಗಲೂ ಒಲವಾಗಬಹುದೇ ಹುಡುಗ...‌‌...???
© ಮೌನ ಹೃದಯ