ನನ್ನೆಲ್ಲಾ ನೋವಗಳ ಮರೆತಿರುವೆ ನನ್ನವನ ಗುಂಗಲ್ಲಿ
ಕಷ್ಟಗಳ ಪ್ರೀತಿಸುವುದು ಕಲಿತಿರುವೆ ನನ್ನವನ ಗುಂಗಲ್ಲಿ

ಮೌನದ ಮಾತಿಂದಲೂ ಮನದ ಅಳಲ ಅರಿಯುವನು
ಕತ್ತಲಲ್ಲೂ ಬೆಳಕನ್ನು ನೋಡುತಿರುವೆ ನನ್ನವನ ಗುಂಗಲ್ಲಿ

ಅತಿ ಸುಲಲಿತ ವಲಯದ ವ್ಯಸನಿಯಾಗಿದ್ದ ಕಾಲ ಒಂದಿತ್ತು
ಸುಲಭವಲ್ಲದ ಕಾರ್ಯ ಮಾಡುತಿರುವೆ ನನ್ನವನ ಗುಂಗಲ್ಲಿ

ಹೊಂದಿಕೆ ಎಂಬುದು ವಿರಳಾತಿ ವಿರಳ ಎಂದೇ ಅನಿಸಿತ್ತು
ಬದಲಾಗುವ ಪ್ರಕೃತಿಯಲಿ ಬೆರೆತಿರುವೆ ನನ್ನವನ ಗುಂಗಲ್ಲಿ

ಮಲ್ಲಿಗೆ ಸುಮವಿದು ಬಾಧಿಸುವುದ ಅರಿಯದೆ ಅರಳಿತ್ತು
ವಿಷ ಮುಳ್ಳುಗಳ ಮೆಟ್ಟಿ ಬರುತಿರುವೆ ನನ್ನವನ ಗುಂಗಲ್ಲಿ.