Umr ne jab talaashi li,
Toh jebon se lamhe baraamad hue.
Kuch pareshaaniya thi, kuch gham the.
Kuch hi salaamat mile, jo the bachpan ke.

Bachpan mein kayi khel khele.
Jawaani mein dekhe sapnon ke mele.
Shayad umr ka takaaza hai,
Jo aaj hoon tanha, akele.

Bachpan mein chhoti chhoti cheezon se
Khushiyan haasil hoti thi.
Jawaani mein har shaam
Yaaron ki mehfil hoti thi.

Bachpan mein dil ko behlaya karte the.
Jawaani mein dil kisi se lagaya karte the.
Bachpan mein mann hi mann kahaniya banaya karte the.
Jawaani mein mohabbat ke nagme gungunaya karte the.

Humein khabar bhi na hui
Aur lamhe hatheli se ret ki tarah fisalte gaye.
Hum yun hi bezubaan bankar
Zindagi ka har sitam sehte hue chalte gaye.

Humne jo khuda ke saamne sajda kiya
Toh har dua namanzoor hui.
Jab khud ko bheed mein bhi akela paya
Toh aankhein rone ko majboor hui.

Aaj saare haseen khwaab toot gaye.
Aaj woh saare saathi apne chhoot gaye.
Aaj beete dino ki yaadon se ghira hoon,
Warna baaki sab toh mujhse rooth gaye.

Iss duniya mein jeene-marne ki rasm nibhaate hue
Kho diya humne kayi apno ko.
Auron ke khwaabon ko haqeeqat mein badalne ke liye
Humne khud hi tod diya apne sapno ko.

Beet gaya bachpan aur guzar gayi jawaani.
Humne sunayi apni daastan in lafzon ki zubaani.
Zindagi bhar mein boht kuch paya aur khoya.
Khatm ho gayi ab zindagi ke khaas palon ki kahani.
© Charanjit Kaur