சன்னலுக்கு வெளியே மின்னும்
மின்சார விளக்கு வெளிச்சத்தை
தாகந்தீரப்
பருகிக் கொள்கிறது
திரைச் சீலை...

ஒட்டிப்பிறந்த பெட்டிகள் போல
உடனிருந்த நமது கைப்பேசிகள்
காணாமூலையில்
கண்சிமிட்டியபடி
கேட்பாரற்று கிடக்கின்றன...

காணாமல் போய்விட்ட
திராச்சைப் பழங்களை பற்றி
விதைகளிடம் விசாரிக்கிறது
பலகாரத் தட்டு...

அவிழ்த்து எறியப்பட்ட
நமது ஆடைகளொடு
கிசுகிசு பேசுகிறது
மேசை நாற்காலி...

அரை நாளிகைக்குமுன்
நாம் போட்ட காதல் சண்டையை
கண்டுகொள்ளாதது போல
தனது கடமைச் செவ்வனே
செய்கிறது மின்விசிறி...

உன்னையும் என்னையும்போல்
களைப்படையாமல்
இன்னும் ஓடிப் பிடித்து
விளையாடுகின்றன
கடிகார முட்கள்...

கருமையான அறைக்குள்
மின்னும் சின்னக்
குண்டு பல்ப்பின்
பிரகாசத்தில் மிளிர்கிறது
உனது வியர்த்த முதுகு...
...