तूं तो प्राणां सूं प्यारी रै बावळी, तूं प्राणां सूं प्यारी
तूं तो ज्यान् है म्हारी रै बावळी, तूं प्राणां सूं प्यारी

थारी म्हारी जौड़ी असी लागसी, मैं बुंटौ तूं क्यारी रै बावळी
तूं प्राणां सूं प्यारी

सपनौ दैख्यौ होरयौ ब्यावलौ, सखियां बनड़ी गारी रै बावळी
तूं प्राणां सूं प्यारी

याद तूं आवै अन्न नहीं भावै, आ कुणसी बैमारी रै बावळी
तूं प्राणां सूं प्यारी

जद जद देखूं डूब सो ज्याऊं, झील सी आंख्यां थारी रै बावळी
तूं प्राणां सूं प्यारी

थारै बिना जीणौ कलडो हुगो,बण ज्या तूं घर आळी रै बावळी
तूं प्राणां सूं प्यारी

हिवड़ौ भर आवै रोणौ आवै, म्हानै छोड क्यूं जारी रै बावळी
तूं प्राणां सूं प्यारी

थारै बिना मरणौ लोग बाळसीं, मनड़ा सूं मत बाळी रै बावळी
तूं प्राणां सूं प्यारी

© छगन सिंह जेरठी