Aaj aasmanon ne apna kad badha liya ,
Suna hai kisi aurat ne udaan bhari hai ,
Pair ghunghroo se bandhe hain ,
Fir bhi chhalaang bhari hai ,
Parindon ne par samet liye ,
Kyuki aaj bat badi hai ,
Haan ye wohi hai ,
Jo har kadam par kamjor khadi hai ,
Kabhi maa , kabhi behen , kabhi beti ,kabhi bahu ,
Fir bhi insaan nahi hai ,
Hai dharm - granthon me shreshth ,
Magar sabal nahi hai ,
Haan ye wohi hai ,
Har jung lari hai ,
Muskaan bhari hai ,
Par hai tu ek aurat ,
Yehi to kamjor kadi hai ,
Haan ye wohi hai ,
Har qamyabi likh rahi hai ,
Chal bhi rhi hai ,
Daud bhi rhi hai ,
Bekhauf har dagar ,
Dushmanon ko tod rahi hai ,
Kya ye wohi hai ,
Haan ye wohi hai ,
Apni kokh amar kar ,
Nayi duniya garh rahi hai ,
Ab har mukaam bhi ,
Ek mutthi me samete ,
Bas chal rhi hai ,
Shayad har raste bhi ,
Usi ke intezar me hain ,
Har wadiyan uske isteqbal me ,
Har waqt shish nawaje hain ,
Ki wo dekho ,
Fir ek aurat uth khadi hai ,
Haan ye wohi hai ,
Haan ye wohi hai .