गुरु राया आणि सर्व गुरुभक्तांच्या चरणी हे काव्य समर्पित..

अनंताचे डोही चैतन्याचे घडे
शोधिता सापडे श्रीदत्तधाम..१

त्रिगुण स्वरूप निरखावे क्षण
नित्य समाधान मिळे अंतरी..२

पराचा साक्षेप जीवनी धरावा
जिवीचा विसावा तोचि अंतिम..३

श्रीदत्त चरण अंत्योदय स्थान
जाणावा महान गुरु महिमा..४

सुजल ते नेत्र नसे तया थांग
नमावे साष्टांग तया पुढती..५

ज्ञानियांचे ज्ञान गुरुराज ठायी
स्वामींचेच पायी जग अवघे..६

मास मार्गशीर्ष लावितसे लळा
भक्तिचा सोहळा कैवल्य रूप..७

रुद्राक्षाच्या माळा सस्मित वदन
शुद्ध होई प्राण मात्र दर्शने..८

स्वामी गुरु राया तू विश्वमाऊली
खात्रीची सावली भव जीवनी..९

जाणिले अवघे ते काय लिहिणे
तरी असे उणे तव पदासी..१०

मी निमित्तमात्र तूचि परिणाम
नित्य निजधाम जन्मजन्माचे..११

मी सूक्ष्म ईशान्य तू सृष्टि अनन्य
जीव होई धन्य तुझिया कृपे..१२

© ईशान्य (निखिल दातार)
मार्गशीर्ष पौर्णिमा, शिवशके ३४९
७ डिसेंबर २०२२, रात्रौ ८.१२
इचलकरंजी...