ಎಚ್ಚರವಿರಲಿ ಸದಾ ಹೆಜ್ಜೆಯನಿಡುವೆಡೆ
ನಮ್ಮ ಬದುಕೊಂದು ಹೆಣೆದ ಬಲೆ
ಬದುಕನ್ನು ಕಣ್ಣಿಟ್ಟು ಕಾಯಬೇಕು ಎಲ್ಲಾ ಕಡೆ
ಬದುಕಲ್ಲಿ ಏಳದಿರಲಿ ಬೆಂಕಿಯೆಂಬ ಜ್ವಾಲೆ//

ನಮ್ಮ ಜೀವನವೇ ಅದ್ಭುತವಾದ ಕಲೆ
ಕಷ್ಟ-ಸುಖಗಳೆಂಬ ಹೋರಾಟದ ನಡುವೆ
ಬದುಕಿ ಬಾಳಿದರೆ ಮಾತ್ರ ಜೀವಕ್ಕೆ ಬೆಲೆ
ಸುಂದರವಾದ ಕನಸುಗಳೇ ನಮಗೆ ಒಡವೆ//

ಬದುಕೊಂದು ಬಡವ-ಶ್ರೀಮಂತನೆನ್ನುವ ತಕ್ಕಡಿ
ಅತಿಯಾಸೆ ಪಟ್ಟರೆ ಜೀವನವೇ ಮುಳುಗಡೆ
ಇದ್ದುದ್ರಲ್ಲಿ ತೃಪ್ತಿ ಪಟ್ಟರೆ ಸಂತೃಪ್ತಿಗೆ ಮುನ್ನುಡಿ
ಭೇದ ಭಾವವಿಲ್ಲದೆ ಮೆರೆದರೆ ಬದುಕೇ ಬೆಳಕಿನೆಡೆ//

ಎಚ್ಚರವಿರಲಿ ಸದಾ ಹೆಜ್ಜೆಯನಿಡುವೆಡೆ
ಯಾಕೆಂದರೆ ಸ್ವಲ್ಪ ಎಡವಿದರೆ ಬದುಕು ಮೂರಾಬಟ್ಟೆ
ಮಾನ, ಅವಮಾನಗಳ ಎದುರಿಸಬೇಕು ಹಲವು ಕಡೆ ಸರಾಗವಾಗಿ ಸಾಗಿದರೆ ತುಂಬುವುದು ನಮ್ಮ ಹೊಟ್ಟೆ//

ಬದುಕಲ್ಲಿ ಮೂಡದಿರಲಿ ತಾತ್ಸಾರಭಾವ
ಸಾಧಿಸುವ ಹಠವಿರಲಿ ಸ್ವಾಭಿಮಾನ ವಿರಲಿ
ಇಲ್ಲದಿರಲಿ ಮತ್ತೊಬ್ಬರ ತುಳಿದು ಬದುಕುವ ಪ್ರಭಾವ
ಆಗಲೇ ಬದುಕಾಗುವುದು ಬಣ್ಣದ ರಂಗೋಲಿ//